الثلاثاء، 14 سبتمبر 2010

تجربتي مع الليزر


رداء أزرق ، وطاقية بيضاء
فتاحة معدنية كتلك التي تفتح بها المعلبات ..
تُفتح عيني عن آخرها بتلك الآلة المعدنية
ضوء أخضر،، وتركيز
ركزي على النقطة الخضراء ،، لا تحيدي ببصرك عنها
خوف وتشنج طفيف ،، ولسان رُبط حين فكر بالدعاء
أبي يجلس على بعد ثلاثة أو أربعة أقدام
يتابع مباشرة تارة ،، وتارة أخرى عبر الشاشة القريبة
أتذكر كلمات ابنة خالتي المفزعة: ماذا لو عطستِ وعينك مثبتة بذلك الفاتح المعدني؟
علميًا لا يجوز العطس دون إغلاق العينين ،، تخرج العين من محجرها إذا حدث ذلك
-يااا ..... !!
- سؤال وطرى على بالي
نعتها بالغباء وبالتفاهة ،، ونسيت الموضوع
ولكن حين سلمت نفسي تحت ذلك الجهاز وعيني بين ذلك المعدن
لم أستطع إلا أن أردد طوال الوقت: يارب ماأعطس يارب ماأعطس ..
الحمدلله مر الأمر بسلام ،، ويد الطبيب المعالج كانت خفيفة كما يقولون
فقط التشنج المصاحب للتركيز خوفًا من الوقوع في الخطأ ،، والتحرك...
شممت رائحة الليزر تحرق شيئا ما
ثلاثة أيام قضيتها وسط العتمة ،،
وألم لازمني لمدة يومين كاملين
ودموع تنهمر بدون سبب ،،
صاحبها زكام لازم لتلك الدموع التي ازدحمت في المقل فسلكت طريقا آخر للخروج
أحلى مافي الموضوع كم الرعاية والدلال الذين أحطت بهما
والدتي ترى طلباتي ، وتلك تحضر طعامي ، وذلك يسألني إن احتجت شيئا
حتى أني وددت لو ادعيت الألم لفترة أطول حتى تطول فترة الرعاية والحب
وبعد أسبوع تحسنت عيني وصرت أرى ... كالصقر ;/
هذا ما كان معي قبل ثلاثة أسابيع
وسبب انقطاعي في الفترة السابقة التزامًا بنصائح الطبيب ...

*أجريت العملية عند الدكتور خالد السبتي،
ولم تكن الليزك وإنما الليزر، بعد أن بين لي الفرق بينهما ونصحني بالأخيرة
وجدت في الشبكة شرحًا مبسطًا للفرق بين الاثنتين، لمن يريد الاستزادة هنا

52 التعليقات:

may يقول...

سلامات سلامات
الحمد لله على السلامة

لوووووول
ذكرتيني بذيك الأيام

خفت ، تصروعت ، والله زين ما زر عقلي من الخرعة!

يمه يمه يمه

انتي لو ماخذة رايي قبل ما تسوينها جان تمام ،،، تدرين ليش ؟
أنا من الخرعة لي الحين كلما احد يسألني عن العملية اقول لهم عن مشاعر الخوف وتفاصيل الرعب ، وصدمة الحرق ، والضوء والسرير والغرفة والليت الأحمر عند الباب !!!!
مسرحية رعب !

بعدين لما يسوونها ، يقولون ويييييه
مي ماكو شي!!

العملية سهلة ،،،

:/

يعني من كثر ما اخرعهم ، يحسون ان طلعت ولا شي ويحسبوني ابالغ..

بس انا من صجي أخرعهم :(

أهم شي
ارتحتي من العدسات والغسول ...

الحمد لله
انعام ربي علينا وايده

طولت بالرد !
أهم شي شلونج الحين؟
أهم شي ماكان فيج نشلة
^_^

Seema* يقول...

لا لا لا..إلا الأفكار الوسواسية اللي تطري حزة الحزة..وإذا ولو وشلون!
ولما نخلص نستغرب, من صجنا كنا خايفين من هذا؟ شـ كنا نفكر فيه؟ ;p


الحمدلله على السلامة!
:)

ebtsamh يقول...

حمدالله ع السلامه ..وألف لا بأس عليج

والله قلبي كان حاس ان غيابج مو طبيعي

بس الحمدالله جت ع جذي وبس ..

ادامك الله لنا جميعا .. :)

BookMark يقول...

مي

الله يسلمج ويخليج


لوووول اشوة اني ماسمعت منج p;

صح كل الي سألتهم قالوا سهالات ومافيها شي! شفينا جذي عيل؟!

والله تميت ابجي بالليل أقول لو أدري انها جذي تعور ماسويتها!

بس الحين لا اشوة اني سويتها .. النتايج حلوة وأهم شي مثل ماقلتي ارتحنا من العدسات والغسول ;)
وافتكيت من النظارة لأني لبستها ثلاث شهور قبل العملية وكانت لايعة جبدي منها :/


الحمدلله الحين وايد زينة
وبدون نشلة
وياحلات النظر ;))

غير معرف يقول...

سلامات
بس ديري بالج على عيونج وسمعي كل تعليمات الطبيب
والحمدلله عالسلامه

الحياة الطيبة يقول...

الحمد لله على السلامة Book Mark الحين عرفت ليش فقدتك وانشغلت عليك كأني حاسة إن فيك شيئ .....أجر وعافيه ,ضحكتني مي لما قالت خفت وتصروعت زين ما زر عقلي ...ذكرتني بنفسي كنت خايفة وابتسم علشان أشجع نفسي وبقيت أهون بعدين تماسكت ولزمت القرآن لما خلصت ,وكأني تميت في غرفة العمليات سنة مع إنها فترة قصيرة ومللت الطبيب من كثر ما تحركت ,توتر موطبيعي وخرعه بس الحمد لله تمت على خير ,وايد ناس قالوا عادية واطلعت تماتيك ,الحمد لله على السلامة مرة ثانية ومرحباً بعودتك للساحة .

سمو الأميرهـ ..ツ يقول...

الحمدلله ع السلااامة حبيبتي
:)

و عقبااالي أفتك من العدسات ..اللي صارت من الضروريات بالنسبة لي :\


فترة الصيف انقطعت عن لبس العدسات
بس أمس بما إني سرت الجامعه لتسجيل حطيتهم ، حسيت الدنيا حلووة .. وقعدت أقول للكل النظر نعمه احمدوا ربكم عليها...
احنا بدون نظارات نجوف كل شي باهت وميت
:/

الحمدلله ع كل حااال ..

ومشكووره حبيبتي لانج شاركتينا تجربتج
(;

BookMark يقول...

سيما

اي والله كلش مو وقته هالأفكار!
حسيت حقدت على بنت خالتي ليش حطت الفكرة براسي
D:

لما طلعت قلت الحمدلله عدت على خير ;)

الله يسلمج ويعافيج :)

BookMark يقول...

ابتسامة

الله يسلمج حبيبتي

اي والله وهذا كان السبب
ولا مالي غنى عنكم ;)
نسيت أشكرج على السؤال .. ماقصرتي ;*

BookMark يقول...

تحلطم

الله يسلمك ويعافيك
ان شالله نسمع ونحافظ :)

BookMark يقول...

الحياة الطيبة

الله يسلمج ويخليج
بعد قلبي ماتفقدين غالي

لووول اي والله حتى انا ضحكتني
ودامج مجربة عيل حاسة بالشعور!
على قولتج جنها سنة بغرفة العمليات!
على طاري تبتسمين انا تصنمت بمكاني وماتحركت، لدرجة الدكتور قالي شاطرة مالعوزتينا بس كل هذا من الخوف ولا الشجاعة؟
قتله من الخوف طبعا لووول

حلووة اطلعت اتماتيك ;))

الله يسلمج ويحييج :)

BookMark يقول...

سمو الأميرة

الله يسلمج يالغالية

اي والله نعمة كبيرة الحمدلله
ولازم لازم تسوينها أنصحج وبقوة ;)
وايد أريح من هالعدسات الي تأذينا مع الغبار والرطوبة!
بس لازم تكملين 21 سنة عالأقل
أحسن وأضمن مايتغير النظر تالي

Arweena يقول...

الحمدلله ع السلامة ♥

طموحه يقول...

الحمد لله على السلامه

الصراحه بالاول كنت اخاف من هالعمليه بس امدحولي ايها وايد فقلت ها يمكن اسويها بس الحين لأ خليني على الششمه و العدسه احسلي

و صج يمكن عطست شنو راح يصير و لا الدكتور غلط لاااااااااااااااا

خلاص انا مصرة لموقفي و لا لهذه العمليه

مو جني زودتها شوي *_^
فقدناج و فقدنا تدويناتج لفترة و الحمد لله على سلامتج

مركبنا يقول...

سلامات سلامات الف لا باس عليج ان شاء الله

خاتون يقول...

السلام عليكم

سلامات وعسى الله يبارك لج في صحتج

هالعملية وايد انتشروا روادها
أتذكر صديقتي زين الزاد سوتها وما خذت راحة داومت ولمن قربت منها وانا اكلمها دزتني فجاة فعصبت قلت لها شفيج جان تقول لي أشوفج ثلاث لوووووووووووووووول

والدلع حلو بس الصحة والعافية احلى
وعسى الله يحفظج لحبايبج ومحبينج
وانا اقول وين غاطة هههههه


^_^موفقة^_^

رورو الشخبوطه يقول...

سلامات ..

واي شعور يخوف ..

واحنا التخرع عندنا شي طبيعي :\

جنه ناقصنا..

عموما الحمدالله ع سلامه وزين سويتي ..

Amwaj يقول...

الحمدلله على السلامة وما تشوفين شر :)
وإن شاء الله بترتاحين من النظارة والعدسات ولويتهم

الموسوعة الحرة يقول...

السلام عليكم...
الحمد لله على سلامتك اولا!...
طبعا كان الافضل السؤال قبل البدء في امثال تلك العمليات لانه احيانا نصائح المجربين اكثر دقة...بالنسبة لي عملتها قبل اكثر من 10 سنوات ونظرا لتفوق استراليا بهذا النوع من العمليات وطبعا هو مكلف ايضا فأن النتائج باهرة ولا تنسين طبيعة الجو تساعد وايضا العمر ومقدار الضعف الخ من العوامل المساعدة...فترة الشهر الاول صعبة طبعا ثم الشهور الخمسة التالية يتحسن وبعدها يكون طبيعيا ولا ادري هل لديكم بعد العلمية زيارات مجانية للطبيب الذي عملها لمدة عامين كما هو الحال عندنا! وهو بمثابة تأمين عليها واذا ظهرت بين السنة والسنتين اية اعراض او نسبة اقل من 100% فأن المريض مخير بعمل عملية اخرى مجانية لتكملة الدقة...اما الان فيستحسن الابتعاد عن التلفاز والكومبيوتر والشمس والقراءة...يعني عقوبات لا غنى عنها!...
تحياتي الطيبة...

Sami يقول...

ـ الله يمتعج بنعمة البصر و البصيره :)

الجودي يقول...

الحمد لله على السلامه حبيبتي
طهور بإذن الله ما على قلبج شر الحمد الله غدا شرج وارتحتي من العملية و تبعاتها ..

وربي يحفظ لج نور عيونج من كل أذى ..

ويا قلبي أمج وهي تحوفج ما أدري ليش عورة قلبي سلمي عليها ..

Katkoota xD يقول...

سلامات

يماا والله ما اتخيل نفسي مكانج

احساس كلش مو حلوو

و التخرع سالفة ثانية بعد

الحمدالله على سلامتج

بدون تعليق يقول...

الحمدلله على السلامة يا بوكمارك .. اهم شي كم الدلع والتدليع خلصوهم عليج ذيج الايام :)

غير معرف يقول...

الحمدلله على سلامتج

ثلاثة أيام في العتمة .. و.. ألم ليومين .. ما تشوفين شر .. عورتي قلبي

بس ما سألتي الدكتور بعد العملية
شكان راح يصير لو عطست؟
شكان راح يصير لو تحركت عيني؟

she is me

جنون الصّمت يقول...

لووول .. صاجة حزة الحزة تييج افكار مادري شلون صايرة :P

الحمدلله على السلامة :*
والفال لنا ;p

خدمات البحث العلمي يقول...

من فترة ودي اسويها

بس فيه خوف

خايفه انه يغلط الدكتور ويصير لي عمى "لاقدر الله"

مدري شلون بتمر علي فترة ال3 الاسابيع بدون نت ولا جوال ولا قراءه ولا شمس
احس ملل على كذا

كل فتره أأجلها ومادري متى اغصب نفسي واسويها

بس ودي اعرف ليش الليزر افضل من الليزك
لاني كنت ناويه اسوي الليزك

BookMark يقول...

Arweena

الله يسلمج ;*

BookMark يقول...

طموحة

الله يسلمج

لالالالا
ترى كلش مايسوى الخوف
والألم يمر ويعدي وتكبرين وتنسين
والششمة والعدسة ماعليهم كلام بس هم غير لما تشوفين بدون أي مساعدة ;))

والعملية معتمدة أكثر شي على الأجهزة،
أكيد الدكتور له دور كبير
بس احتمال الخطأ ضعيييف حيييل

وانتي صدقتي؟؟؟
أصلا مستحيييل تعطسين وانتي بهالوضع!
تفكريج وتركيزج كله راح يكون بعينج،
يعني راح تنسين تعطسين p;
وكلش كلش اذا حسيتي يتج العطسة سكري خشمج p;

الله يسلمج مرة ثانية وماتفقدين غالي ;*

BookMark يقول...

مركبنا

الله يسلمج ويحفظج
مشكورة :)

امنورة ;)

BookMark يقول...

خاتون
وعليكم السلام، هلا والله

الله يسلمج ويبارك فيج

اي وايد انتشرت وصارت حل سهل وآمن،
اما انها شافتج ثلاث لوووول الظاهر من الزغللة الي بعد العملية

صاجة الدلع حلو
والعافية أحلى أكيد ;)

مشكورة ويحفظج يارب ;*

BookMark يقول...

رورو

الله يسلمج

اي زاهبين حق التخرع ;)

بس ترى مو لهدرجة يعني اتوقع الي قلبه أقوى شوي راح يشوف السالفة ماتسوى وكلش بسيطة،

الله يسلمج ومشكورة :)

BookMark يقول...

أمواج

الله يسلمج حبيبتي الشر ماييج :)

اي والله نرتاح من هاللوية والتأخير اليومي ابسبة هالعدسات مرة تركب ومرة اتعيي وتحر ;)

BookMark يقول...

OpenBook
وعليكم السلام

الله يسلمك
بالتأكيد سألت وشاورت قبل إجرائها،
ولكن لم يذكر لي أحد شعور الخوف ولا الألم اللاحق لما بعد العملية!
الكل أجمع على سهولتها وبساطتها وفقط!
أما التفوق في هذا المجال فأظن أن الأمر صار واسعًا عندنا والعيادات تحرص على جلب أحدث الأجهزة من الخارج،
طبعا الجو مهم، فرق بين أن تعملها وتنطلق في الجو المعتدل وبين أن تعملها وتتحاشى الحر والغبار والرطوبة!
نعم هناك مراجعة شهرية ولكن لا أدري إلى متى تستمر، ولم أعرف بعد إن كانت مجانية أم لا!
أتوقع أن الاهتمام بالبشر عندكم أكثر وأوسع مما هو عندنا!
بالفعل ابتعدت عن الشاشات لثلاثة أسابيع، وحاليا قلصت ساعات استخدامي لها،
أما الشمس فليس بوسعي الابتعاد عنها سوى بالاحتماء خلف النظارة السوداء :)
شكرا لكم ..

BookMark يقول...

سامي

آمين، تسلم :)

BookMark يقول...

الجودي

الله يسلمج حبيبتي

الحمدلله طبنا وغدا الشر

والأمهات ياحلاتهم والله خوفهم علينا يعور القلب،
بعد قلبي يوصل سلامج ;)

BookMark يقول...

Katkoota

الله يسلمج ويخليج

اي والله الخرعة كلش مو حلوة،
بس النتايج تنسيج كل شي ;)

مشكورة :)

BookMark يقول...

عبدالله (بدون تعليق سابقا)

الله يسلمك

لووول الدلع والتدليع لو في منهم بعد ماأقول لأ

BookMark يقول...

she is me

الله يسلمج ويعافيج
وسلامة قلبج ;*

بغيت أسئله بس خفت يضحك علي p;

شوفي العطاس شي من الخيال مااتوقع تقدرين تعطسين وانتي بهالوضعية وتفكيرج كله بعينج،
أما الحركة فصار وتحركت بس الظاهر انه يوقف الليز بسرعة وقالي لأ شوفي سيدة و رد كمل،
ف أتوقع مو بهالبساطة يصير خطأ
ولا عيون الناس كلها راحت ;)

BookMark يقول...

جنون الصمت

لووول صح حزة الحزة توقعي غير المتوقع ;)

الله يسلمج حبيبتي
اي الفال لكم بس كملي 21 أول p;

BookMark يقول...

مبدعة

لأ ترى احتمال الخطأ ضعيف حيل،
لأن ما قط سمعت انه أحد صارت له مشكلة مع العملية،

اف الملل سئليني بس!!
صج ملل ومادري شسوي لا نت ولا تلفزيون ولا شي،
قلت حق أمي شلون حياتكم بدون انترنت شلون ماتملوون p;

لأ مش الليزر أفضل
ولا الليزك أفضل
كل وحدة لها طريقة مختلفة ولها مميزات ويمكن عيوب،
بس على كلام الدكتور الليزر أفضل للمدى البعيد،
والليزر ألمها يطول يومين أما الليزك 8 ساعات بالكثير،
بس هم مو شرط أتوقع كل دكتور له نظرة،
وانتي اخذي براي الدكتور الي تسوين عنده،
توكلي على الله وعزمي .. سهالات ;)

Engineer A يقول...

الحمدلله على السلامة ..

وايد استفدت من التجربة والرابط ..

وللحين متخوفة اسويها :(

سلة ميوّة يقول...

سلامات

حمدالله على سلامتج
وعسى عينج اتشوف الفرح دايما قولي امين


حبي:***

BookMark يقول...

Engineer

الله يسلمج ويعافيج

لا تترددين
استخيري وتوكلي على الله وسويها
واذا عندج أي سؤال انا حاضر ;)

BookMark يقول...

سلة ميوة

الله يسلمج حبيبتي

آمين .. مشكورة ويخليج حق حبايبج يارب ;*

كوكتيل يقول...

صج أني مغبرة بس لفت نظري إسم البوست قلت أشوف الحلوة شفيها

حمدلله على السلامة

وألف مبروك :)

والله يديم عليك الصحة والعافية يارب :)

BookMark يقول...

كوكتيل

الله يسلمج ويعافيج

ماتقصرين :)

غير معرف يقول...

الحمدلله على السلامه وما تشوفين شر

>> مت من الضحك على يا رب ما اعطس :p

توني ادري ان فيه فرق بين الليزر و الليزك حسبالي نفس الشي :p

تسلمين ع العلومه ^_^

azhar يقول...

الحمدلله عالسلامه
وهذا اهم شي صرتي زينه الحين
امم انواع كثيره من العمليات على حسب
القرنيه والشبكيه للشخص
والمها وخفتها برضو تعتمد على نوعيه عمليتك
انا سويتها قبل رمضان بسبوعين
واكره ذيك الايام بمعني الكلمه
كانت مؤلمه بشكل
بس زين انتي ماشيه حالك ماشالله
يالله حاولي تاحافظي عليهم
وربي يحميك

BookMark يقول...

Unique

سوري على الرد المتأخر
توني أشوفه أو شفته ونسيته مادري شلون :/

الله يسلمج حبيبتي والشر مااييج،
حتى انا ماكنت أدري ان في فرق بينهم،
وعسى دوم الضحكة ;)

BookMark يقول...

azhar

الله يسلمج عزيزتي

الله اكثروا أنصار الليزر ;)
عيل الحمدلله على سلامتج

نورتيني :)

خدمات البحث العلمي يقول...

الحمدلله سويتها
وارتحـــــــــــــت

BookMark يقول...

حبييبتي الحمدلله على سلاااامتج

يالله عاد الحين ارتاحي وريحي عيونج لا تجابلين الكمبيوتر وايد ههههه لاحقه عليه ان شاءالله .. اهم شي عينج ;)