الاثنين، 3 يناير 2011

لاتتكلمين بالسياسة

لا ترضى أمي أن نتكلم بالسياسة
وتكره ذلك
بل ولا تسمح به في بيتنا
-ليش يمه عادي الكل يتحجى ليش احنا ممنوع؟ لازم نساير الموضة
وتستمر في تحذيرنا، وربما شكتنا إلى الوالد، وتحذرنا من التحدث بكلام كهذا في مقر العمل، سمعتها تقول أشياءً عن أناس مدسوسين..
-يمه شنو مدسوسين شدعوة ترى كلهم ربعي
تقول أنه في هذه المواضيع لا يُعرف العدو من الصديق، قالت أنهم سيذهبون بي خلف الشمس
-منو يوديني ورى الشمس؟؟
تقول أن هناك من يسمونهم الكبارية، هم من سيفعل ذلك
- لا يمه بس ماظنتي يسحبوني انا صغيرة
لم توافقني، وقالت أنه في هذه المواضيع أيضا لا يفرق بين الكبير والصغير، وأبدت استغرابها من أنني (أزعل) و(أمد بوزي) إذا ما نعتُ بالصغيرة، فلماذا الآن بالذات أقول ذلك عن طيب نفس؟!
- ههههههه لا يمه انا صغيرة على السياسة :))

48 التعليقات:

أبو فارس يقول...

عندها حق الوالده الكلام في السياسه بيودي في داهيه:)
تحياتي

جعفر حجير يقول...

الأمهات دائما يخشون على أبنائهم من المخاطر.. و ربما كان الحديث في السياسة بالنسبة للأم أخطر من أن يلقي ابنها نفسه عن سطح بناية شاهقة
في فلسطين الوضع كذلك.. و أمي ربتنا بنفس الحال
مع التحية

منصور الفرج يقول...

ياحلو كلام السياسه الشي الوحيد اللي نجذب فيه دون خوف :)

أهم شي تنقلين كلام الديوانيه ( اللى عروقها بالماي ) بالحرف و محد يكلمج هههههههه

موفقه بإذن الله

Seema* يقول...

الماما معاها حق ;P

الحياة الطيبة يقول...

سمعي كلام الحبيبة يا Book Mark وخلي السياسة لأهلها ولأنها صارت تضيق الخلق وإلا اشرايك ؟
تحياتي .

~أم حرّوبي~ يقول...

عيل الوالده صايره شرات أبوي ...شلون
نتهزأ لي يبنا طاري السياسة .."بيمسكونكم ..في كاميرات..اقمار صناعيه "وويييييييييي عيل خير شر لا نرمس خخخخ

بس صدق السياسة تقصر العمر مشاكل العالم ما تخلص :$

يبه خلي السياسة لاهلها شراتي ..انا ماعرف شو يصير بالعالم الا بالصدفة خخ

الجودي يقول...

سمعي كلامج يا بنية و يوزي عن السياسه

p;

سلمي لي على أمج و حبيها عني
و هي صاجه مستوى الامان هالأيام اشوي لج عليه فالحرص زين يا الغالية

جنون الصّمت يقول...

لوووول .. ذكرتيني بشي يخص اختج
اتوقع بتعرفينه p;

عيل شرايج باللي تقول : لا تتكلمين بالسياسة ! انوثتج تنمحي ;p !

الله يخليها لكم : )

Seldompen يقول...

مساء الخير

:)

اعتقد ان اغلب الاهل يمنعون ابنائهم من التحدث بالسياسة
خصوصاً في وقتنا الحالي ، احياناً حينما اتحدث عن بعض المواضيع البسيطة جداً تشير اختي الكبيرة الي النافذة وتقول : ترى لها آذان !

الله يسلم امك يارب ، وكوني بنت مطيعة
" دائماً نكون صغار في الاشياء التي نريدها ، وكبار في الامور التي تحتاج الى ان تكوني كبيرة فيها "

تحياتي لكِ وللماما الطيبة :)  

ebtsamh يقول...

ذكرتيني بفلم صغيره ع الحب خخخخ

حكيمة الوالده .. لزوم تسمعين كلامها

عسى الله يخليها لج :)

الليوان يقول...

ياحبيبتي امميتج...
بعد قلبي قلبها..

والله هالايام ماتعرفين الصاج من الجاذب
فترك السالفة برمتها ..واااايد ابرك

الله يخليلج الوالدة..ويحفظها يارب
سمعي كلامها .. وعن الخرابيط
لاتقثينها..

:)

طموحه يقول...

اقول سمعي كلام امج عدل
ولا تتنشطين بالسياسة زيادة عن اللزوم

ترى الامهات يعرفون مصلحتنا اكثر منا

may يقول...

ياحبي والله ..
الله يطول بعمرها ويخليها لج ..
هي تتكلم من واقع عاشته أيام الخير.. أيام ما كان في حاجة الواحد يتكلم بالسياسية ..
ياحلوها من أيام..

طيعي الوالدة ولا تتكلمين بالسياسة مباشرة ، وتقدرين تتكلمين بالسياسة براحتج بأسلوب الرمز ;) ..
بيفهمج اللي معاج ع الخط..
وبنفس الوقت طيبتي خاطر الوالدة..

:)

BookMark يقول...

ابو فارس

يودي بستين داهية كمان :)

BookMark يقول...

جعفر حجير

صحيح
ويبدو أن الحال متشابه جدا عند كل العرب

أهلا بك أسعدتني الزيارة :)

BookMark يقول...

منصور الفرج

لوووول ;)
صاج والله
كل من نقل كلام الدواوين صار سياسي

حياك الله :)

BookMark يقول...

seema

اتهقين يعني نبطل؟ p;

BookMark يقول...

الحياة الطيبة

اي والله صارت تضيق الخلق ونخليها لأهلها أحسن ;)
والحبيبة كلامها مسموع ;*

BookMark يقول...

أم حروبي

ههههههه يحلييله
الله يخليه لكم يارب .. ماينلام الصراحة الدنيا تخوف

لا لايغرج انتي شايفة ويهي ويه سياسة? p;
بس نرمس مع العالم الي يرمسون ;)

BookMark يقول...

الجودي

لااا يختي وانا مالي والسياسة؟ p;

يوصل سلامج حبيبتي
وحبتج العافية ;*

BookMark يقول...

جنون الصمت

لوووول كنت بقولج شنو مافهمت
بس خلاص عقب الي كتبتيه بالفيس بوك عرفت p;

ههههههه من صجج منهي هذي؟
يحليلها! بس صاجة لأن من عمرنا السياسة للرياييل، الحين بس الي كل شي تغير ;/

تسلمين ويخليلج أميمتج يارب ;*

BookMark يقول...

..pen seldom

مساء الوررد

والله ماينلامون الأهالي الوضع يخوف هالأيام،، وكل شي نتوقعه يصير

هههههه صاجة اختج..الحيطان لها ودان

اييه متى مااشتهينا صرنا صغار ومتى مابغينا كبرنا عمرنا ;)

باذن الله اكون مطيعة كالعادة p;
وتوصل تحياتج :)

BookMark يقول...

ابتسامة

ايي ابالي عاد صغيرة عالحب p;

ان شاالله نسمع الكلام :)

آميين ويخليلج اميمتج يارب

BookMark يقول...

الليوان

هههههه مااقثها والله
بس شوية لزوم التطفر p;

آميين ويحفظلج اميمتج،، ويخليج حق بناتج يارب ;**

BookMark يقول...

طموحة

اي والله يعرفون مصلحتنا أكثر منا

بكل المرات الي سويت فيها الي براسي اكتشفت ان اهي الصح!
ف خلاص بطلت اسوي الي براسي وصار رايها اهو الأول والأخير ;))

BookMark يقول...

مي

اي والله ياحلوها من ايام

صاجة والله خوش حل ;)
اهم شي خاطرها
مشكوورة مي .. ويخليلج بناتج وكل أحبابج يارب ;*

~حَدِيـثُ الفَـجْـر~ يقول...

أوووه مبرووك الينو لوك :)

امج جنها امي :q
امي ماترضا من صوب .. وابوي يمعنها ويقعد يكلمنا من صووب الله احنا شنو نسوي ؟

ههه خايفه عليج يحليلها بس ترى صاجه ديري بالج ..
و خل نفتك من هالسياسه ترى كلها عوار راس ..

بالتوفيق :)

aL-NooR . يقول...

shes right
:)

يا حلووهاااااا
سلمي عليها وقوليلها
سلام من النور هههههه


حبتها :*


*****************

كوكتيل يقول...

صباح الخير على الحلوين :)

أنا مع رأي الوالدة :)

إحنا عندنا في البيت عندي أختي وأمي طبعا كله يقولون لنا جذي :(

وإحنا ولا حياة لمن تنادي :)


بس فعلا مو بس يودي وراء الشمس لو في مكان أبعد يوديله بعد :)

دمتي بود :)

BookMark يقول...

روح ضائعة

الله يبارك فييج ;)

لوووول شفتي شلون
الظاهر كلنا نفس الحالة

اهي صح ماوراها إلا عوار الراس
بس شنسوي يختي الحال يجبرنا ;/

منورة :)

BookMark يقول...

النور

يووصل سلام النوور ;)

بعد عمري حبتج العافية ;**

BookMark يقول...

كوكتيل

مساء الوررد

ماينلامون والله
لازم يحذرونا ولا احنا اذا محد مسكنا ننطلق بعييد ابعد من الشمس بوايد لووول

حياج الله :)

ساره النومس يقول...

مالوم اهالينا والله

BookMark يقول...

طموحة مملوحة

الله يلوم الي يلومهم

الوســــــــــــــــم يقول...

ما الوم امك امي مثلها بس جن الامهات نسو ان السياسه شي اساسي لو ماتكلمنا فية اهو بيتكلم فينا

صرحي برايك خالفي من تريدين و وافقي من تريدين بس تذكري دايما انك محمية من الدستور

مادة - 30 الحرية الشخصية مكفولة
مادة - 36 حرية الرأي والبحث العلمي مكفولة, ولكل إنسان حقالتعبير عن رأيه ونشره بالقول أو الكتابة أو غيرهما, وذلك وفقا للشروط التي يبينها القانون .

و قبل كل شي عزيزتي الله الحامي

بس شرايك بمواد الدستور صايرة كل ما قالوا شي ارد و اقول لهم مادة... من الدستور تقول ...

و محد له شغل عندي ما دام "الدستور في جيبي"

BookMark يقول...

الوسم

ماشاءالله عندنا قانونية اهني ;)

عدل كلامج بس الدستور هاليومين جنها هيبته مهزوزة ومحد محترمه!

الله الحامي

غير معرف يقول...

الله يخليها لج ان شاء الله ويخليج لها

شوفي اخطاء المعارضه عندنا وتعلمي منهم P:

صفحات مُلطخّة بحروفي يقول...

أمّج معاها حق ..
وآنه بعد ، طول عمري راح أظل صغيرة عالسياسة =q

Amwaj يقول...

صاجة الوالدة كلامها عدل
خلصت المواضيع يعني ؟!!
لا تعورين راسج بالسياسة وعيشي حياتج بعيد عنها :)

ومبروك النيو لوك :)

غير معرف يقول...

الله يخليلج الوالده
سمعي كلامها بغض النظر عن قناعاتج فدافعها الحرص والخوف والطاعه واجبه
وبيني وبينج السياسه ما وراها إلا الغثا ولوعة الجبد وفرقاها عيد
والحديث بالسياسه عندنا مثل النفخ في جربه مقضوضه
بدون نتيجه

غير معرف يقول...

السلام عليكم ورحمة الله وبركاته :

مثل أمي وزوجي تماما الله يحفظهم دووم تهاوشني واذا كتبت شي بالمدونة يخص السياسه ياويلي منها ههههه

طيب السياسه تخصنا وتخص وطنااو تخص عالم مظاليم نسكت ما نتكلم حتى مايبونا نكتب عنهاليش طيب ؟

بس امك من خوفها عليك وحبها لك .

تمنياتي لكي بالتوفيق والسعاده , وسلام خاص لأمك الله يحميها.

سعد المحطب يقول...

عندنا وعندج خير : )

امي إذا سمعتني أقول كلمة بالسياسة ..
إما تشوف تلفزيون أو تقرا قرآن ..

المهم إنها ما تنتبه وما تعطيني ويه ..

BookMark يقول...

إنسان

آمين ويخليلك أهلك وحبايبك

أتعلم من المعارضة؟؟ معناته أنغمس بالسياسة أكثر !! ;)

حياك الله أسعدتني الزيارة

BookMark يقول...

صفحات مُلطخّة بحروفي

اي ياوخيتي خلينا صغار عليها أحسن وأريح ;))

BookMark يقول...

أمواج

هههههه اي خلاص حرمت ;)

يبارك فيج حبيبتي ;*

BookMark يقول...

تحلطم

تسلم يارب ويخليلك كل حبايبك

اييه يالجربة المقضوضة
الله كريم
نتحلطم أحسن
:)

BookMark يقول...

رندا الجنوبية
وعليكم السلام ورحمة الله وبركاته

ياهلا بالحبايب :)

ايي الحال من بعضه يختي
من خوفهم علينا
الله يخليهم لج يارب
والله يفرجها ومانحتاج نتكلم بالسياسة أبد قولي آمين

يوصل سلامج حبيبتي ;*

BookMark يقول...

اجتماعي

الحمدلله على السلامة

لووول عيل احنا العكس .. اذا شمت ريحة سياسة تيي تحاجينا ولو كان الموضوع ماله شغل بالسياسة :)

الله يخليها لك