الأحد، 2 يناير 2011

عهد قديم .. وفرابتشينو


قد يتساءل البعض لمَ كل هذا الزهو
والخربشة المبالغ فيها
لا شيء .. فقط أحببت التغيير
تزامنًا مع السنة الجديدة والعهود الكثيرة بضرورة التغيير؟
ربما نعم .. وربما لا
ولمَ التغيير أصلا؟ ولمَ البدء من جديد؟
أفي كل مرة نبدأ فيها من جديد؟
وماذا عن العهد القديم؟
والطرق التي بدأنا فيها؟
والأشياء التي شرَعنا في بنائها
وحصاد السنة الفائتة؟ ألا نجنيه الآن؟
***
في المطار
أتوه مع الأمتعة
وأمعن النظر في وجوه القادمين
يباب هنا .. ودموع هناك ...
أبتاع زجاجة عطر
وأتمنى لو أغلف مع الشحنات
أحمد الصغير يبكي بين يدي
أجد نفسي "متوهقة" في حمله .. وأشعر أنه سيقع في أية لحظة
هو لا يكف عن البكاء
بالرغم من أن "المصاصة" لاتزال في فمه
لازال متشبثا بها بقوة .. ومجهشا بالبكاء
أقتلعها من بين شفتيه
وأغمسها في الفرابتشينو .. وبالتحديد في الكريما الوفيرة
وأرجعها إلى فمه
يتذوق الطعم الجديد ...
ها هو أخيرا يتوقف عن السيمفونية المزعجة
وأبتسم أنا براحة .. ويزول التوتر
ثم .. يعاود البكاء من جديد!! وبصوت أعلى من سابقه!!
اه لقد انتهى من لعق الكريما كلها
أسحب المصاصة من جديد وأعيد الكرة
أغمسها بالكريما وأعيدها إلى فمه
ويصمت
وهكذا إلى أجل غير مسمى
هي: بس مو زين ! أمه ماترضى !
- شسوي لازم نسكته
أنظر إليه وأحاول الحديث معه
- عاد أقووولك .. ترى امك يابت بنت .. وخلاص ماراح يهتمون فييك !!
لم يفهم شيئا من حديثي .. غير أنه انفجر باكيًا !
-لالالالا خلاص خلاص اوش اخر مرة مااعيدها !
أتذكر .. لم يفهم .. ولكنه اشتاق للكريما

34 التعليقات:

ebtsamh يقول...

جميل التغيير في لوك المدونه ..

ومبروك ما جاكم .. رغم انك لم تحددي

صلتك بالمولود ..

وعسى الله يكثر افراحكم ويزيدها ..

وو .. صباح الورد :)

BookMark يقول...

ابتسامة

ولهنا على هالطلة


يصير ولد ولد خالتي ;)

آميين وأفراحكم يارب

وصباحج ابتسامة ;*

الحياة الطيبة يقول...

يسعد صباح الغاليين ,اللوك وايد حلو والتغيير أحلى لأنه يجدد النفس ومافيه خربشه زايده بالعكس فيه حياة ,فيه ذوق راق , والبدء من جديد وفي كل مرة يوجه التركيز لمكان آخر وزاوية أخرى وهذه فائدة التغيير .
وماذا عن العهد القديم ؟ العهد القديم في قلوبنا ,طرقنا القديمة وما بنيناه في السنة الفائته استوفينا فوائده وصرنا ما نحن عليه الآن بفضله فشكراً لله .
أحمد الصغير والفرابتشينو ذكرتني إني وايد أجرب الأشياء الجديدة على الأطفال وألاحظ ردة فعلهم ...في كل ملرة أقول (جرب هذا شيئ جديد عليك ...إيش رايك ؟) وغالباً الطفل تكون عنده روح الإكتشاف في أحسن أحوالها ....بوست جميل Book Mark ,تحياتي .

لولا الأمل يقول...

لوووووول يحليييله

الله يخلييه لكم


كل عام وانتي بخيير

ومبروك النيو لوك ;)

أحمد محمدي يقول...

هناك مشاركة مميزة لكِ في مدونتي

وكانت عبارة عن ابتسامة

(:

فها هي تعود إليكِ بابتسامة عريضة ولذيذة كـ " الكريما " وكل عام وانتِ مبتسمة

mese يقول...

كل عام وإنتي بخير
وحلو التغيير, ينعش الروح في كل شيء.

جو المطارات ما أحبه:|
ومبروك المولود الجديد.
والولد جوعان ونودان وإنتي شكلج مالج خص بهالسوالف :)

أسعد الله أوقاتج..
ودي

الجودي يقول...

شرح اللون اليديد حبيته

و حبيت أحمداني و صوته ازعجني

لو زايده الغطة لي القهوة يمكن يهدي و يتكيف ..

بس جذي تكونين مساهمه في زيادة عدد المدمنين عليها ..واحد :)

كل عام وأنت بخير

سلة ميوّة يقول...

جميل التغير بل رائع
انا انسانه تعشق التغيير بطريقه..والتمسك بالقديم بطريقه اخرى

من ناحية الخلفيه..

وفقتي...
فهي رائعه
وتمثلك ببساطتها وجمال الوانها



هاهاهاه الفرابتشينو علاج لكل دااااء


حبيت البوست

لطيف خفيف وظريف

Seema* يقول...

حبيت الثوب الجديد الذي ترتديه مدونتك. أبيض صافي, سيمتلئ مع الأيام بالألوان والبهجة.
كل عام وأنتِ بخير! :")

أبو فارس يقول...

مبروك ما جاكم يتربا في عزكم
ومبروك الستيل الجديد جميل جدا
وكل عام وانت نجمه فى سماء التدوين
وسنه سعيده عليك وعلى السره الكريمة

تحياتي

طموحه يقول...

السلام عليكم

على البركة اللوك اليدي
و عسى الله يحفظه لكم ان شاء الله
بس خوش حل تغيرين طعم المصاصة شوي

غير معرف يقول...

كلام جميل
اسعدتني كثيرا قراءة كلماتك :)

Sami يقول...

جميل التصميم الجديد... لو تشيلين النقشه الي بالأطراف يكون افضل

~أم حرّوبي~ يقول...

وااااااااااه أول ما دخلت مدونتج حسيت بانتعاش التغيير ..
حلو التغيير..يمكن موشرط كل بداية سنة بس لازم نغيير..نكمل القديم ونبدأ بشي جديد ..طبعا محد ينسى ماضيه لانه اساس في الياي

مادري ليش سيرة الأمتعة تثير فيني أشجان وأحزان ...بس يي فخاطري أقول آآآه :(

حمووود من قده عنده ذوق فرابتشينو عااد
الله يحفظه ..
:)

may يقول...

مبروك اللوك اليديد ،،
يونس ،،

:)

والعهد القديم ،،
إييييه ، صدقتي ؟ وين الحصاد ؟
الله يعين..

/
الفرابتشينو
بدعتي فيه ، هذا من الحين بيتعلم ع القهوة ..
/
أحلى شي ان امه يابت بنت ، تهقين عشان جذي يبجي ..

^_^

صباحك ورد وفل وياسمين

الزين يقول...

الخط الخط
عيوني راحت
:)

جميل البوست
رقيق
مفرح ومليء بالتفاؤل
حبيته

كل عام وانت بخير بعد قلبي
وعسى الله يحقق كل امانيج يارب
:**

BookMark يقول...

الحياة الطيبة

ياصباح الفل ..
وكله من ذوقك الرفيع ;)
صحيح ما بنيناه أدى إلى ماصرنا عليه، الحمدلله

حلو انج تجربين الأشياء على اليهال صح؟
ردة فعلهم غالبا غير متوقعة ومفرحة

منورتني كما دائما :)

BookMark يقول...

لولا الأمل

آمين ويخليلكم يهالكم يارب :)

الله يبارك فيك والفال لمدونتك

وكل عام وانت بصحة وسلامة :)

BookMark يقول...

أحمد محمدي

:)

الله يديمها عليكم يارب
الابتسامة

شكرا لمرورك وابتسامتك

BookMark يقول...

mese

هههههه اتهقين يعني يوعان وانا مادري عنه؟
بس قالولي انه توه ماكل ف ماحطيت فبالي أبدا :/

صبحج الله بالخير :)

BookMark يقول...

الجودي

تسلمين عسى ربي يشرح صدرج وأيامج

وي من صجج أزيد الغطة
يعني أزيد الجرعة ;)
والله كان ودي بس خفت يدمنها على قولتج ;)

كل عام وانتي بخير وعافية ;*

BookMark يقول...

سلة ميوة

صح التغيير مطلوب
ودام اعجبج خلاص يعني وفقت فيه رسمي ;))


والفرابتشينو علاج وآخر العلاج يمكن ;)

وانا احب الي حبت البوست ;*

BookMark يقول...

Seema

جميل أنك لاترين سوى الأبيض
يؤكد لي هذا بياضك ونقائك ;)


وكل عام وانتي بصفاء وبهجة ;*

BookMark يقول...

أبوفارس

الله يبارك فيك يارب

وكل عام وانت والأهل بخير وسلامة :)

BookMark يقول...

طموحة
وعليكم السلام ورحمة الله وبركاته

الله يبارك فيج ويخليج

اي والله احسن حل مجرب
المصاصة احط فيها كل شي مو بس كريما، وشوفي النتيجة ;)

BookMark يقول...

غير معرف

وانا سعيدة أنها أسعدتك :)

شكرا لك

BookMark يقول...

سامي

مااقدر أشيلها تصير الصفحة بيضا كلش :/
النقشة الجانبية والي داخل كلهم يايين مع بعض

BookMark يقول...

أم حروبي

فرحتني ردة فعلج ;)
مشكورة حبيبتي من ذوقج
والتغيير مهم مع التمسك بالقديم أكيد

والأمتعة وإثارتها للأشجان .. اييه ماتنلامين وانا اقول معاج آآه

شفتي عيال اخر زمن!! فرابتشينو وطالع ;))

BookMark يقول...

مي

الله يبارك فيج حبيبتي

والحصاد موجود .. يمكن ينقصنا مزارع (حصّاد) ماهر؟ ;)


اي أهقى ليش مااهقى
لووول اهو مايدري عن هوا داره وانا أزيده

صباحج و مسائج زرع وثمرة :)

BookMark يقول...

الزين

صج الخط؟
عاد زين عندي!
يمكن جهاز عن جهاز يفرق
بس بشوفله حل ان شاالله

بعد عمري الجمال تشوفه عيونج بس

وكل عام وانتي بخير وفرح
ويحقق أمانيج يارب ;*

Unique Girl يقول...

لوول كلمات حلوه

والبلوق وايد حلو والشخابيط هم حلوه

عليج بالعافيه وكل عام وانتي بخير

BookMark يقول...

Unique Girl

مشكورة حبيبتي من ذوقج :)

وانتي بخير وسلامة يارب

نورتيني :)

خاتون يقول...

السلام عليكم ...

بالنسبة للطلة الجديدة "نعيما"

وياحلوه لاعب فيكم وعرف شلون يآخذ حقوقه
ههههههههههههههه
^_^

BookMark يقول...

خاتون

الله ينعم عليج
عاد اللوك الي كتبت عنه بالبوست هذا كان شي ثاني شي خيال لووول
غيرته مرة ثانية ..


اييه عرف شلون يلعب فينا ههههههه

حياج الله :)